Cart

bhiD mein ek ajnabi ka samna achchha laga

bhiD mein ek ajnabi ka samna achchha laga

sab se chhup kar wo kisi ka dekhna achchha laga

surmai aankhon ke niche phul se khilne lage

kahte kahte kuchh kisi ka sochna achchha laga

baat to kuchh bhi nahin thin lekin us ka ek dam

hath ko honTon pe rakh kar rokna achchha laga

chae mein chini milana us ghaDi bhaya bahut

zer-e-lab wo muskuraata shukriya achchha laga

dil mein kitne ahd bandhe the bhulane ke use

wo mila to sab irade toDna achchha laga

be-irada lams ki wo sansani pyari lagi

kam tawajjoh aankh ka wo dekhna achchha laga

nim-shab ki KHamoshi mein bhigti saDkon pe kal

teri yaadon ke jilau mein ghumna achchha laga

is adu-e-jaan ko ‘amjad’ main bura kaise kahun

jab bhi aaya samne wo bewafa achchha laga

Leave a Reply

Your email address will not be published. Required fields are marked *

Loading...