Ghazal Collection

Famous Collection of ghazal, poems and nazms of Amjad Islam Amjad.

us ke lahje mein barf thi lekin

sae Dhalne charag jalne lage

log apne gharon ko chalne lage

itni pur-pech hai bhanwar ki girah

jaise nafrat dilon mein palne lage

dur hone lagi jaras ki sada

karwan raste badalne lage

us ke lahje mein barf thi lekin

chhu ke dekha to hath jalne lage

us ke band-e-qaba ke jadu se

sanp se ungliyon mein chalne lage

rah-e-gum-karda taeron ki tarah

phir sitare safar pe chalne lage

phir nigahon mein dhul uDti hai

aks phir aaine badalne lage

Ye Jo Hasil Hamein Har Shai Ki Farawani Hai

ye jo hasil hamein har shai ki farawani hai

ye bhi to apni jagah ek pareshani hai

zindagi ka hi nahin Thor-Thikana malum

maut to tai hai ki kis waqt kahan aani hai

koi karta hi nahin zikr wafadari ka

in dinon ishq mein aasani hi aasani hai

kab ye socha tha kabhi dost ki yun bhi hoga

teri surat teri aawaz se pahchani hai

chain lene hi nahin deti kisi pal mujh ko

roz-e-awwal se mere sath jo hairani hai

ye bhi mumkin hai ki aabaadi ho is se aage

ye jo ta-hadd-e-nazar phailti virani hai

kyun sitare hain kahin aur kahin aansu hain

aankh walon ne yahi ramz nahin jaani hai

taKHt se taKHta bahut dur nahin hota hai

bas yahi baat hamein aap ko batlani hai

dost ki bazm hi wo bazm hai ‘amjad’ ki jahan

aql ko sath mein rakhna baDi nadani hai

sae Dhalne charag jalne lage

sae Dhalne charag jalne lage

log apne gharon ko chalne lage

itni pur-pech hai bhanwar ki girah

jaise nafrat dilon mein palne lage

dur hone lagi jaras ki sada

karwan raste badalne lage

us ke lahje mein barf thi lekin

chhu ke dekha to hath jalne lage

us ke band-e-qaba ke jadu se

sanp se ungliyon mein chalne lage

rah-e-gum-karda taeron ki tarah

phir sitare safar pe chalne lage

phir nigahon mein dhul uDti hai

aks phir aaine badalne lage

usne aahista se jab pukara mujhe

us ne aahista se jab pukara mujhe

  jhuk ke takne laga har sitara mujhe

tera gham is fishaar-e-shab-o-roz mein

hone deta nahin be-sahaara mujhe

har sitare ki bujhti hui raushni

mere hone ka hai istiara mujhe

ai KHuda koi aisa bhi hai mojaza

jo ki mujh par kare aashkara mujhe

koi suraj nahin koi tara nahin

tu ne kis jhuTpuTe mein utara mujhe

aks-e-imroz mein naqsh-e-diroz mein

ek ishaara tujhe ek ishaara mujhe

hain azal ta abad TuTte aaine

aagahi ne kahan la ke mara mujhe

ye aur baat hai tujhse gila nahin karte

ye aur baat hai tujh se gila nahin karte

jo zaKHm tu ne diye hain bhara nahin karte

hazar jal liye ghumti phire duniya

tere asir kisi ke hua nahin karte

ye aainon ki tarah dekh-bhaal chahte hain

ki dil bhi TuTen to phir se juDa nahin karte

wafa ki aanch suKHan ka tapak do in ko

dilon ke chaak rafu se sila nahin karte

jahan ho pyar ghalat-fahmiyan bhi hoti hain

so baat baat pe yun dil bura nahin karte

hamein hamari anaen tabah kar dengi

mukalme ka agar silsila nahin karte

jo hum pe guzri hai jaanan wo tum pe bhi guzre

jo dil bhi chahe to aisi dua nahin karte

har ek dua ke muqaddar mein kab huzuri hai

tamam ghunche to ‘amjad’ khila nahin karte

The khwab ek hamare bhi aur tumhaare bhi

The khwab ek hamare bhi aur tumhaare bhi

par apna khel dikhate rahe sitare bhi

ye zindagi hai yahan is tarah hi hota hai

sabhi ne bojh se lade hain kuchh utare bhi

sawal ye hai ki aapas mein hum milen kaise

hamesha sath to chalte hain do kinare bhi

kisi ka apna mohabbat mein kuchh nahin hota

ki mushtarak hain yahan sud bhi KHasare bhi

bigaD par hai jo tanqid sab baja lekin

tumhaare hisse ke jo kaam the sanware bhi

baDe sukun se Dube the Dubne wale

jo sahilon pe khaDe the bahut pukare bhi

pa jaise rail mein do ajnabi musafir hon

safar mein sath rahe yun to hum tumhaare bhi

yahi sahi teri marzi samajh na pae hum

KHuda gawah ki mubham the kuchh ishaare bhi

yahi to ek hawala hai mere hone ka

yahi giraati hai mujh ko yahi utare bhi

isi zamin mein ek din mujhe bhi sona hai

isi zamin ki amanat hain mere pyare bhi

wo ab jo dekh ke pahchante nahin ‘amjad’

hai kal ki baat ye lagte the kuchh hamare bhi