مَلت کا پاسباں ہے-امجداسلام امجد

کسی بھی قوم کی تاریخ اُٹھا کر دیکھ لیجئے اس کے ارکان کی محنت، جدوجہد اورکامیابیوں کے پیچھے آپ کوکچھ افرادنظر آئیں گے جن کی تربیت رہنمائی اور کوشش کی وجہ سے نہ صرف ان قوموں کا اجتماعی معیار بلند ہوا بلکہ انہیں اپنے حقیقی جوہر اور فطری قابلیت کو جاننے اور اس کی سمت متعین کرنے کا بھی موقع ملا دوسری جنگِ عظیم کے بعد دنیاکے نقشے میں انقلابی اور حیرت انگیز تبدیلیاں اتنی بڑی تعداد میں ایک ساتھ رونماہوئیں کہ پوری انسانی تاریخ میں ان کی کوئی مثال نہیں ملتی آزادی کی ایک ایسی لہر چلی کہ دیکھتے ہی دیکھتے سو سے زیادہ نئے ملک اٹلس کے صفحوں میں مدت سے چلی آئی سرحدی لکیروں کو درہم برہم کرتے ہوئے ایک نئی دنیا کا منظر پیش کرنے لگے بالخصوص افریقہ اور ایشیا میں نو آبادیاتی تسلط سے آزاد ہوکر کئی ایسے ملک وجود میں آئے جو پہلے کسی ان ناموں اور صورت میں جلوہ گر نہیں ہوتے تھے اور ان کے ساتھ ساتھ بہت سے ایسے لیڈر بھی سامنے آئے جنہوں نے اپنے اپنے ملکوں کی آزادی کے لئے بیش بہا خدمات سرانجام دی تھیں اب اس پسِ منظرمیں برصغیر پاک و ہند پر نظر ڈالی جائے تو یہاں برطانوی حکومت کے ساتھ ساتھ بے شمار چھوٹی بڑی ریاستیں بھی اپنے مقامی سرداروں اور راجوں مہاراجوں کے زیرِ اقتدار کسی نہ کسی طرح جئے چلی جارہی تھیں اگرچہ مسلمان تعدادکے اعتبار سے آبادی کا تقریباً %36 تھے لیکن بطور جماعت اُن کا شمار ہر اعتبار سے آبادی کے سب سے زیادہ پسماندہ حصے میں ہوتا تھا۔ 1906ء میں ڈھاکہ میں پاکستان مسلم لیگ کا قیام بھی بنیادی طور پر کمیونٹی کے معاشرتی مسائل کو حل کرنا تھا یعنی تعلیم کے لئے سکول، کالج اور بیواؤں اوریتیموں کے لئے امدادی ادارے بنائے جائیں اور عمومی طور پر بھی سیاست کا شعبہ کانگریس ہی کے سپرد کر دیا گیا تھا۔

 یہی وجہ ہے کہ قائداعظم محمد علی جناح سمیت تمام مسلمان سیاستدان مسلم لیگ کے ساتھ ساتھ کانگریس کے بھی ممبر تھے یہاں تک کہ مسلمانوں کی تحریکِ خلافت سے متعلق تحریک کے بھی سب سے بڑے پیشوا گاندھی جی ہی تھے تاریخ ہمیں بتاتی ہے کہ انگریزوں کے ساتھ سیاسی سطح پر لین دین کے دوران پہلی بار مسلمانوں کو یہ محسوس ہوا کہ کانگریس اس ضمن میں مسلمانوں کے حقوق اور مسائل سے دانستہ چشم پوشی کر رہی ہے اور وہ حقیقت میں صرف ہندو آبادی کی ہی ترجمان جماعت ہے بیسویں صدی کی تیسری دہائی میں یہ احساس اور کشمکش دونوں زیادہ کھل کر سامنے آگئے اور چودہ نکات کے معاملے نے اس نام نہاد اتحادکا پول اس بُری طرح سے کھولا کہ قائداعظم مسلمان سیاسی رہنماؤں کی کم مائیکی اور حالات سے مایوس ہوکرچند برسوں کے لئے انگلستان چلے گئے جہاں سے اُنہیں واپس بلانے میں حکیم الامت علامہ محمد اقبال نے کلیدی کردار ادا کیا اور اس کے بعد کی کہانی ہم سب کے سامنے ہے کہ 1935ء سے 1947ء کے بارہ برسوں کے درمیان قائد کی قیادت میں نہ صرف تحریکِ پاکستان کا آغاز ہوا بلکہ اُن کی دانش، سیاسی بصیرت اور اپنے مقصد سے محبت کی وجہ سے وہ ارمانوں اور اُمیدوں سے بھرا ہوا ملک پاکستان معرضِ وجود میں بھی آگیا جس میں ہم سب مختلف طرح کے نشیب و فراز کے باوجودپچھتر برس سے ایک ایسے باقاعدہ اور آزاد ملک کے طور پر دنیا کے نقشہ پر موجود ہیں جو دنیا کی ساتویں اور عالمِ اسلامی کی واحد ایٹمی قوت بھی ہے۔

اس سارے عمل میں قائد کا کردارایسا ہے کہ جس کا ہر پہلو روشنی سے معمورہے بدقسمتی سے اُن کی اس دنیا سے جلد رخصتی کے بعد وطنِ عزیز کو ایسے رہنما نہیں مل سکے جو اُ ن کے مشن کوذمہ داری کے ساتھ آگے بڑھاتے نہ صرف بنگالی بھائی ہم سے علیحدہ ہوگئے بلکہ سیاست، معاشرت، مذہب، تہذیب، تعلیم، انصاف، بنیادی جمہوری اقدار اورقوتِ برداشت کے حوالے سے بھی ہمارا ریکارڈ بے حدافسوسناک ہے۔

چند برس قبل مجھے پی ٹی وی کے ایک قومی مشاعرے میں شرکت کے لئے زیارت جانے کا موقع ملاکہ یہ مشاعرہ اسی ریذیڈنسی میں ہورہا تھا جس میں قائد نے اپنی زندگی کے آخری چند دن گزارے تھے اب اسے ایک قومی یادگار کا درجہ دے دیا گیا ہے اس کے کاموں میں گھومنے پھرنے اور اس میں سانس لینے کے دوران ایک نظم نے جنم لیا سو آج قائد کے 146یوم ِپیدائش کے موقع پر میں اس نظم کو اہل وطن کے ساتھ شیئر کرتا ہوں کہ اس میں خواب اورخواب کی تعبیرکے ساتھ قائد کی دانش اوربصیرت بھی ہماری ہم سفرہے رب ِکریم اُن کی روح کو اعلیٰ ترین درجات عطا فرمائے اور ہماری قوم کو ان کے سامنے مزید شرمندہ ہونے سے بچائے۔ آمین

زیارت ریذیڈنسی میں ایک شام