نغمگی کے قدِ بالا پر قبائے سازتنگ 2-امجداسلام امجد

مندرجہ بالا نظموں کا زمانہ تحریر قیاسی طور پر 1925ء اور 1940ء کے درمیان بنتا ہے جبکہ ان میں صنفِ مخالف کے ساتھ تعلقِ خاطر کی جو تصویریں سامنے آتی ہیں ان میں وہ عملی سطح پر دم بدم کھلتے اور اقداری سطح پر جس ماحول کی منظر کشی کرنے کے کوشش کر رہا تھا وہ دلکش اور توجہ طلب بھی تھا اور نیا اور اجنبی بھی کہ اس سے قبل کسی ”خاتون“ کی شخصیت کی بھرپور موجودگی کا اظہار زیادہ سے زیادہ علامہ صاحب کے لفظوں میں ”کی گود میں بلی دیکھ کر“ سے آگے نہیں بڑھ پاتا تھا لڑکیوں کو زندگی میں ”مراۃ العروس“ کے علاوہ اور اس سے آگے اور بھی بہت کچھ جاننے کی ضرورت ہے کہ اب انہیں گھروں میں چھپا کر رکھی ہوئی اور ایک معشیت اور رشتہ داریوں میں اُلجھن ہوئی کموڈیٹی سے آگے وہ کچھ کرناتھا جس کے باعث اسی دنیا کے اندر سے ایک نئی دنیا نے ظہور کرنا تھا اور زندگی کے ہر شعبے میں اُس کی بھرپور موجودگی اور استقامت نے اُس وقت کے مستقبل قریب میں ایک مخصوص انداز کے ”طوفانِ نوح“ سے بھی گزر کرنا تھا۔

مجازؔ کا ایک بہت بڑا کمال یہ ہے کہ ا ُس نے اپنے مخصوص رومانوی انداز میں ہی سہی مگر پہلی بار اپنے اور اردگرد میں موجود عور ت کی اس صلاحیت کو نہ صرف تسلیم کیا بلکہ اُس کے ساتھ مل اور چل کر ان منزلوں کو آسان کرنے کے لئے بھی ایسے راستے سُجھائے جو اُس وقت خالص مردوں کا علاقہ سمجھے جاتے تھے۔میڈیکل، نرسنگ اورتدریس کے ساتھ ساتھ دوسری جنگِ عظیم کی طرف تیزی سے بڑھتی ہوئی دنیا میں برصغیر کی آنکھیں مل کر جاگتی ہوئی عورت کے لئے اور بھی کئی راستے تھے مگر تاریخ، تہذیب، معاشرتی اقدار اور ”گھر کی ذمہ دار مالکن کا دھندلکا“ آج کل کی ”سموگ“ کی طرح ہر راستے میں پھیلا ہوا تھا جبکہ مجازؔ اس فکر اور فلسفی کا داعی ہونے کے باوجود خود بھی پوری طرح سے اس کے امکانات سے شائد آگاہ نہیں تھا اپنی اس بات یا خیال کی تائید کے لئے چند نظموں کی ان جستہ جستہ لائنوں کو دیکھنا یقینا دلچسپی سے خالی نہ ہوگا۔