بارے بجلی کا کچھ بیاں ہوجائے۔امجداسلام امجد

آج واپڈا اور اُس کے ”کو“ ٹائپ اداروں لیسکو، فیسکو، میسکو وغیرہ وغیرہ نے بجلی کے بلوں کے حوالے سے پاکستانی عوام کی جو حالت کردی ہے اگر کسی طریقے سے ایڈیسن کے علم میں لائی جاسکے تو شائد وہ بھی ”تو استعفیٰ مرا بہ حسرت دیاس“ کا راستہ اختیار کرلے اس میں تو کوئی شک نہیں کہ آج کی انسانی زندگی سے اگر اس ایجاد نما دریافت کو منہاکردیا جائے تو ہر چیز ایک ایسی نیم تاریکی میں ڈوب جائے گی کہ جس کا عملی طور پر تصّور کرنا بھی مشکل ہے کہ اب یہ کم و بیش آکسیجن کی طرح ہماری زندگیوں کا حصہ بن چکی ہے۔

ہمارے جیسے ترقی پذیر اور سائنسی حوالے سے پسماندہ ملکوں میں روزافزوں آبادی کی کثرت اور بجلی کے ضیاع کی بلند تر شرح کی وجہ سے اس کی آسان، سستی اور مسلسل فراہمی ایک سنگین مسئلے کی شکل اختیار کر چکی ہے کہ ہمارے یہاں معمول کے معمولی لائن لاسز کے علاوہ بھی اس کی کمی اور مہنگائی کے بہت سے اسباب ہیں اور اس حمام میں بجلی کے محکمے سمیت اس کے مختلف استعمال کنندگان اور چور سب ایک سے ننگے ہیں کہ اگر لائن مین گھروں کے میٹروں کی ریڈنگ کو مُک مُکا کے ذریعے کچھ سے کچھ کر دیتے ہیں تو اُن کے افسران بڑی بڑی فیکٹریوں کے مالکان سے ”سمجھوتہ“ کرکے وہاں استعمال ہونے و الی بجلی کو جادو کی ٹوپی پہنا دیتے ہیں اور جہاں تک عوام کا تعلق ہے وہ شہر وں میں ”کُنڈا کلچر“ یا بعض علاقوں میں زبردستی کی مفت بجلی کے باعث اس صُورتِ حال کو مزید گھمبیر بنا دیتے ہیں رہی سہی کسر حکومتیں پورا کردیتی ہیں کہ ان سارے نقصانات کو جمع کر کے کسی حکم یا فیصلے کے ذریعے سے عام اور ایمانداری سے بل ادا کرنے والوں کے کھاتے میں ڈال دیا جاتا ہے جو انہیں تسلیم ا ور ادا کرنے پر مجبور ہوتے ہیں کہ عدم ادائیگی کی صورت میں اُن کا حُقہ پانی بند ہوجاتاہے یعنی بجلی کے بلبوں اورٹیوبوں کے ساتھ ساتھ فریج، فریزر، واشنگ مشین، ہیٹر، اے سی، کُولر، موبائل کے چارجر اور دروازے کی گھنٹی تک کام کرنا چھوڑ دیتے ہیں اور یہ وہ سزا ہے جو فی زمانہ اگر موت سے زیادہ نہیں تو کم بھی نہیں۔

ا س ساری رام کہانی ا ور تمہید کا مقصد مزید واضح کرنے کیلئے میں سب سے پہلے آپ سے نومبر 2021ء کے بل کے مندرجات شیئر کرتا ہوں کہ جس میں استعمال شدہ بجلی کی اندازاََ 20روپے فی یونٹ کے حساب سے 4956/-روپے قیمت لگائی گئی ہے جو اپنی جگہ پر ایک سوالیہ نشان ہے مگر فی الوقت ہم اس کی بحث میں پڑے بغیر اُن ٹیکسز کی بات کرتے ہیں جن کے اصل ناموں کا پتہ لگانا شائدخدا اور ان ٹیکسوں کے عائد کرنے و الوں کے سوا کسی اور ذِی روح کے بس کی بات نہیں سو میں ان کو من و عن درج کر رہا ہوں۔