سایوں میں چُھپی روشنی

لیکن یہ سب کچھ ہونے کے باوجود کبھی کبھی اور کہیں کہیں روشنی، اُمید،دردِ دل اور ایثار کے ایسے منظر بھی دیکھنے میں آتے ہیں کہ آنکھوں کے سامنے پھیلی ہوئی مایوسی، بے چینی، فرسٹریشن اور رنجیدگی جیسے ایک دم ہَوا سی ہوجاتی ہے اور ”اپنے رب سے کبھی مایوس نہ ہونا“ کا مطلب سمجھ میں آنے اور رُوح کو جگمگانے لگتا ہے۔ چند روز قبل کی ایک سہہ پہر اِسی کیفیت کی آئنہ دار تھی جب مجھے لاہور میں انڈس ہسپتال کو دیکھنے اور اِ س کارِ خیر میں شامل کچھ غیر معمولی حضرات سے بالمشافہ ملنے کا موقع ملا جیسا کہ ہم سب جانتے ہیں اس منصوبے کی بنیاد اِس کے بانی ڈاکٹر عبدالباری اور اُن کے کراچی کے احباب اور معاونین نے کوئی پندرہ برس قبل رکھی تھی اُس وقت شائد اُن کی اس ٹیم کے بھی گمان میں نہ ہوگا کہ ایک ایسا اچھوتا ”عوام دوست اور قربانی ا ور ایثار پر استوار کیا گیا ایک بظاہر ناقابلِ عمل اور دیوانے کے خواب جیسی تصوّراتی دنیا نہ صرف حقیقت کا رُوپ دھار لے گی بلکہ ایک صدقہ جاریہ کی طرح پورے ملک میں پھیلتی چلی جائے گی کرونا کی آمد سے کچھ ہی عرصہ پہلے مجھے ڈاکٹر باری کے ساتھ انگلستان کا ایک دورہ کرنے کا موقع ملا جس کا بنیادی مقصد وہاں پر اہلِ دل پاکستانیوں کا اس سے تعارف اور فنڈریزنگ تھی باری صاحب کی دانش، سادگی اور اپنے کام سے کمٹ منٹ کو دیکھ کر میرے اندر کا رجائت پسند بھی جیسے یک دم بیدار ہوگیا برادرم محمد صدیق شیخ نے جو انڈس کے انتظامی بورڈ کے بھی اہم رکن ہیں جب پہلی بار مجھے انڈس ہسپتال کراچی کا راؤنڈ لگوایا تو مجھے اپنی آنکھوں اور کانوں پر یقین کرنا مشکل ہوگیا کہ ایک ایسا معاشرہ جس میں ”صحت“ ایک مقبول اور کامیاب کاروبار بن چکی ہے اور جس کی وجہ سے غریب اور نچلے متوسط طبقے کے لئے بیماری ایک ڈراؤنے خواب کی شکل اختیار کر چکی ہے کہ ہسپتالوں، ڈاکٹروں اور دواؤں کے اخراجات اُس کے ساتھ ساتھ پورے کے پورے خاندانوں کو تباہ کر کے رکھ دیتے ہیں ایسے میں کوئی ایسا جدید ترین سہولیات سے مزّین ہسپتال جس میں سرے سے کوئی کیش کاونٹر ہی نہ ہو اور مریض کا علاج ایک مِشن سمجھ کر کیا جائے بظاہر ایک ناقابلِ عمل بات تھی لیکن پھر ہم نے دیکھا کہ کراچی ہی کے مخیّر حضرات نے نہ صرف اس نا ممکن کو ممکن کر دکھایا بلکہ ڈاکٹر عبدالباری اور اُن کے رفقاء کو یہ حوصلہ بھی دیا کہ وہ اس خواب کو مزید آنکھوں تک پھیلائیں۔

 
لاہور میں ساڑھے چھ سو بستروں پر مشتمل انڈس ہسپتال کی وسیع اور شاندار عمارت نہ صرف کھڑی ہوچکی ہے بلکہ اس کی OPD اور سو بستر بھی تکمیل کے مراحل طے کرکے اب فنکشنل ہوچکے ہیں اس منصوبے کی کل لاگت تقریباً سولہ ارب روپے ہے معلوم ہوا کہ اقبال قریشی، جاوید بھٹی برادران، نسیم ریاض مرحوم، ہائر گروپ اور کچھ اور احباب کی مدد سے نہ صرف ساٹھ کنال زمین انہیں بطور عطیہ ملی بلکہ ابتدائی تعمیر کے چھ ارب روپے بھی پلک جھپکتے میں انہی دوستوں نے مہیا کردیئے۔ دس ہزار ڈاکٹروں، نرسوں اور معاون عملے کے ساتھ مریضوں کے آپریشن اور دواؤں کے اربوں کے اخراجات بھی اسی ملک کے اہلِ دل مسلسل مہیا کرتے رہتے ہیں اور یوں یہ اب تک کے تیرہ انڈس ہستپال بہت خاموشی اور سلیقے سے خلقِ خدا کی خدمت کرنے آرہے ہیں جہاں ایک طرف ایدھی صاحب کا لگایا ہوا پودا اب الخدمت، اخوّت، ٹی سی ایس، چِھیپا، غزالی کڈنی سنٹرکینسر ہسپتال، شوکت میموریل اور کئی دیگر اداروں کے قیام کی شکل میں ایک باغ کا سا منظر پیش کر رہا ہے وہاں صحت کے شعبے میں انڈس اور SIUT کی خدمات بھی نہ صرف یاد رکھی جائیں گی بلکہ اس قافلے میں نئے لوگ بھی مسلسل شامل ہوتے رہیں گے اور یوں بے رحم، سنگ دل اور عوام کے استحصال پر مبنی سیاست کے لگائے ہوئے زخموں پر ایک طرح سے مرہم بھی لگتی رہتی ہے میں، میرے اہلِ خانہ اور احباب بھی اس کارِخیر میں حتی الممکن دامے،درمے، قدمے، سخنے اس جنت نشان قافلے کے ساتھ چلنے کی کوشش کرتے رہتے ہیں سو آخر میں انڈس کے لئے ایک گیت جو ان شاء اللہ بہت جلد آڈیو اور ویڈیومیں بھی آپ تک پہنچ جائے گا۔