سرفرازشاہد۔امجداسلام امجد

اُردو نثر اور شاعری دونوں میں طنزومزاح کے انداز میں لکھنے والے گنتی میں تو بہت ہیں لیکن جن لوگوں نے شعری اور اخلاقی معیار کو قائم رکھتے ہوئے عمدہ شاعری کی ہے ان کی تعداد اتنی کم ہے کہ ایک طرح سے انگلیوں پر گِنی جاسکتی ہے اگرچہ کلاسیکی اساتذہ کے یہاں بھی کہیں کہیں اسی نوع کے اشعار مل جاتے ہیں کہ قاری بے ساختہ ہنسنے پر مجبور ہوجائے مگر میرے خیال میں اُردو کا پہلا باقاعدہ مزاح گو شاعر اکبر الٰہ آبادی ہی بنتا ہے اب اگر اس صف میں سیّد محمد جعفری، سیّد ضمیر جعفری، طحہٰ خان، نذیر احمد شیخ، ظریف جبل پوری،سرفراز شاہد اور انور مسعود کو شامل کر لیا جائے تو اسے باآسانی پہلی اور نمائندہ صف قرار دیا جاسکتا ہے۔

سرفراز شاہد چند روز قبل اپنا سفرِ حیات مکمل کرکے اس دنیا سے پردہ کرگئے ہیں وہ مزاج میں تو دھیمے تھے مگر اُن کا طنز اور مزاح دونوں کی کاٹ دیدنی تھی اس پر وہ پڑھتے بھی ایک مخصوص انداز میں تھے جس میں وہ پھکڑ پن نہیں ہوتا تھا جس میں آج کے بہت سے مزاحیہ شاعر گرفتار ہیں۔ میں ذاتی طور پر علیحدہ سے مزاحیہ مشاعروں کے حق میں نہیں کہ ان سے دو طرح کے نقصانات ہوتے ہیں ایک تو سامعین کا ذوقِ شعری خراب ہوتا ہے اور دوسرے ان شعرا کو بھی انہیں ہنسانے کے لئے ایسے موضوعات اور ہتھکنڈوں پر زور دینا پڑتا ہے جو مشاعرے کو آج کل کے بیشتر نام نہاد مزاحیہ سٹیج ڈراموں کی سطح پر لے آتا ہے میری رائے میں ان شعرا کو ماضی کے اور باقاعدہ مشاعروں کی طرح اپنا کلام سنانا چاہیئے جس سے نہ صرف مشاعروں کے رنگ اور دلچسپی میں اضافہ ہوگا بلکہ وہ بھی مزاحیہ مشاعرے کے لیبل سے آزاد ہوکر بہتر انداز میں اپنی شاعری پیش کرسکیں گے۔

سرفراز شاہدمرحوم کی شاعری کا سب سے بڑا کمال اسی معیار اور توازن کو قائم رکھنا تھا کہ وہ سامعین کو محظوظ بھی کرتے تھے لیکن اس کے ساتھ ساتھ اور پھکڑ پن میں اُلجھے بغیر نِت نئے اور خیال افروز مضامین کو بھی بڑی مہارت اور خوش اسلوبی سے سامنے لاتے چلے جاتے تھے اُن کے یہاں سکہ بند مزاحیہ موضوعات کے ساتھ ساتھ زندگی کے ایسے شعبوں پر بھی مزاحیہ اور دلچسپ تبصرے ملتے ہیں جن سے اُن کی ذکاوت، مطالعے اور مشاہدے کا وہ بھر پور اظہار ہوتا تھا جو انہیں دیگر ہم عصر شعرا سے واضح طور پر ممتاز کرتا تھا مجھے اُن کے ساتھ بے شمار مشاعرے پڑھنے کا اتفاق ہوا ہے اور میں نے انہیں ہمیشہ متبسم اور ملنسار پایا خواتین ا ور خصوصی اپنی ہی بیویوں سے چھیڑ چھاڑ آج کل کے مزاح کا عمومی ٹرینڈ بن چکا ہے سرفراز شاہد نے بھی اس موضوع پر بہت لکھا ہے لیکن ایسے سنبھلے ہوئے اور دلچسپ انداز میں کہ انہیں زیادہ داد مشاعرے میں موجود خواتین سے ہی ملتی تھی اُن کیلئے مغفرت کی دُعا کے ساتھ جستہ جستہ کچھ چوکے چھکے کہ وہ چار اور چھ مصرعوں والے قطعات کو انہی الفاظ میں بیان کیا کرتے تھے عنوانات کے انتخاب میں بھی اُن کی حسِ مزاح خوب چمکتی تھی مثلاً اس پہلے چھکے کا عنوان ہی آپ کے ہونٹوں پر مسکراہٹ لے آتا ہے ”دو اُداس اور غمگین شوہروں کی گفتگو“